ចិន៖ ក្រុមហ៊ុនផលិតរថយន្តអគ្គិសនី Tesla Inc. បានធ្វើការប្រកាសនៅថ្ងៃពុធនេះ អំពីការបើកឱ្យមាននូវទីតាំងបញ្ចូលថាមពលដំបូងរបស់ខ្លួននៅលើទឹកដីចិន ដោយប្រើប្រាស់នូវផ្ទាំងសូឡា ព្រមទាំងបរិក្ខាសម្រាប់ការផ្ទុកថាមពលផ្ទាល់របស់ក្រុមហ៊ុនតែម្តង។ 

តាមរយៈការប្រកាសលើបណ្តាញសង្គមចិន Weibo ក្រុមហ៊ុន Tesla បានប្រកាសឱ្យដឹងថា ទីតាំងសម្រាប់ការសាកថាមពលរថយន្ត Tesla ដំបូងរបស់ខ្លួន នឹងដាក់ឱ្យមាននៅទីក្រុង Lhasa នៃតំបន់ទីបេ ដែលនឹងស្រូបទាញយកថាមពលពីពន្លឺព្រះអាទិត្យ ផ្ទុកក្នុងម៉ាស៊ីនរបស់ខ្លួន សម្រាប់សាកឱ្យរថយន្តអគ្គិសនី Tesla ផ្ទាល់។ 

ក្រុមហ៊ុន Tesla បានងាកមករកអាជីវកម្មដែលប្រើប្រាស់ថាមពលមិនប៉ះពាល់បរិស្ថាន ឬហៅថា Green Energy កាលពីឆ្នាំ២០១៦ ហើយក្រោយមកក៏បានចំណាយថវិកាប្រមាណជា ២,៦ពាន់លានដុល្លារសម្រាប់ការចំណាយទិញផ្ទាំងសូឡាផ្គត់ផ្គង់លើគម្រោង SolarCity មានមូលដ្ឋាននៅរដ្ឋកាលីហ្វ័រញ៉ា ថែមទាំងអះអាងទៀតថា ក្រុមហ៊ុននឹងបន្តចំណាយសម្រាប់ការអភិវឌ្ឍថាមពលទ្រទ្រង់អាជីវកម្មរបស់ខ្លួន។ 

ដោយឡែកកាលពីឆ្នាំមុន Tesla ដែលជាក្រុមហ៊ុនផលិតយានយន្តអគ្គិសនីនៅសៀងហៃ បានចាប់ផ្តើមគម្រោងការផ្សព្វផ្សាយការងារ សម្រាប់កិច្ចសហការជាមួយម្ចាស់គ្រប់គ្រងគម្រោងថាមពល Solar និងការផ្ទុកថាមពលនេះនៅក្នុងប្រទេសចិន ដែលគេអាចឃើញថានេះទំនងជាការដើរចូលមួយជំហានធំផ្សេងទៀតរបស់ក្រុមហ៊ុន Tesla ទៅក្នុងទីផ្សារប្រទេសចិន៕